車人一句 絕配方中信 × Aston Martin Vantage Roadster
少見了型男方中信在公仔箱內出現，印象中最近期都要數到兩個月前亞視的外購劇集金庸名著《雪山飛狐》，戲中方sir飾演正是打遍天下無敵手苗人鳳，個朵夠照，但電鬈長毛
手執長劍的造型卻顯得格格不入。
對不起，筆者入晒腦的方中信是緊身tee，長褲短髮港版李察基爾造型，出場要有名車配襯。今天他沒叫我失望，相約他在西貢試新車，他駕著全新兼改了22吋巨軨的AudiQ7施施然而來，未落車已經很型。跳上新Vantage，打開車篷、一個微笑、絕塵而去……我與同行的同事，你眼望我眼，方sir，你真係好型噃！
Aston Martin Vantage Roadster
引擎：4.3公升V8
最大馬力：380ps/7,300rpm
最大扭力：41.8kgm/5,000rpm
驅動系統：前置引擎、後輪驅動
傳動系統：6前速半自動波箱
0-100km/h：5.1秒
極速：280km/h
售價：$2,228,000起
查詢：MF Jebsen Automotive Ltd.（23662017）
想試冇得試
三幅式軚盤有racing感之餘亦不失典雅，＋/－波則設於軚盤後方。 |
轉數表是反方向設計，一踩油與速度表雙雙揮動，型爆。 |
全電動開篷，整個過程只需約20秒。 |
留意枕頭後方有一隱藏保護架，萬一發生意外而翻車，保護架會於1/10秒內彈出，保護車上乘客的頭部。 |
約方中信試車整個過程超過兩個月，遲遲未能成事的原因有兩個。一、他3年沒有替TVB拍劇，現在正忙於還「人情債」，時間表據他形容是「針都插唔入」。二、亦是筆者估計的主要原因，是方中信是圈中數一數二的「玩車男」，法拉利F360、保時捷GT3、平治SL55等超辣跑他亦擁有過，約他試車，冇理由是1.5車仔或7人車吧？經過一輪電話討價還價，最終以全新開篷Vantage「引他上釣」，架車有乜吸引佢，等佢自己講啦！
「之前未出開篷版我已經落過showroom睇過Vantage，唔，不過代理好惜貨，唔畀我試車，所以最後我都冇買到，亦冇機會試車。Vantage是好典型的英國車，內籠玩手工，與大量生產的德國車相比，帶有濃烈的tailormade味道，好靚。不過我最欣賞是它踩油時的排氣聲肯、肯、肯，比林寶的沉實，拉利的高音來得更動聽。」
玩盡名車
方中信出戰1,600c.c.房車賽的EK9戰車，鯊魚女陳細潔贊助了6萬元。 |
 |
方中信在01年亦曾參與房車賽事，是圈中公認的賽車好手，惟近年專注工作已經淡出香港車壇。問他會否再賽車，他答：「幾乎每隔一輪都有朋友問我會否到上海賽車，興趣我就有，不過邊有時間呀，你睇我噚晚開完夜粒暗瘡標咗出嚟，麻煩你出稿時幫我執執佢。」而事實上方sir雖然冇賽車，但對車的要求愈來愈高，由幾年前揸Altezza升格揸波子，之後買埋法拉利及Benz跑，馬力愈揸愈大、車價愈來愈貴。
高轉直路狂
皮革座椅不是好包好有壓迫那一種，而是具承托力得來帶點鬆動，輕輕鬆鬆正是揸開篷Vantage樂趣所在。 |
雙出死氣喉高轉時聲音澎湃，開住篷揸，視覺與聽覺也是享受。 |
 |
 |
方中信對車的要求是明知用唔盡，但卻偏愛大馬力的車種，看看他揀代步車，都要一部擁有300多匹馬力的SUV你便知他是「馬力狂」。當他遇上一架接近400匹馬力的怪獸，再加上一條出名好劈的清水灣道，究竟會有什麼化學作用呢？
「Vantage的馬力好大，不過佢係屬於高轉型，唔係一踩就去號嘅車種，而係好似嘅賽車咁，要keep住4,000rpm以上先有澎湃動力。個人來講高轉時Vantage的動力真係冇得彈，反而是架車始終唔係自己，所以唔係好放膽開油衝入彎，轉數低過4,000rpm就失去洶湧的感覺，F1波箱同F360的反應差不多，上波要像開棍波般縮油才不會有窒的感覺，整體來說架車反應都好快，可能畀我揸耐咗，同佢熟咗我先可以用盡佢。Vantage的彎路表現在supercar來說，都算是中上，始終呢類巡航式跑車唔似以攻彎為主的法拉利F360咁貼地，大直路三號幹線才是佢強項。」咁你會唔會買Vantage？
「之前都有諗過，不過唔開篷都要210萬，開埋篷要230萬，太貴喇！冇錢買，等我拍多幾部戲先啦。」
唔買拉利
 |
英國製造的Vantage矜貴在每一輛也是人手製造，完成後會刻有工程師名字證明此車已被檢驗。 |
中控台以一體化作為設計概念，CD機頭屬builtin式，想改機都難。 |
唔講唔知，Vantage開門時車門也會微微向上升起，不讓林寶專美。 |
尾箱容量小得只能載下handcarry。 |
|
冇錢買？當然是過於謙虛，事實上是在大陸密密「賺人仔」的他早於年頭已在Audi訂購了有未來戰車之稱的AudiR8，連全車option，車價接近240萬，「腳車」揸Q7、「跑車」揸R8，呢期方sir興玩Audi？
「其實我冇話特定要買那一個牌子的跑車，基本上只要有性能、夠馬力都會符合我的要求，未揀R8前都有諗過買法拉利F430，不過近期多了一批另類玩家將跑車quota當樓炒，將架F430炒貴晒，新車要等到'09，易手街價又幾乎貴過新，我覺得咁樣玩車好唔值，所以我就訂咗架R8。R8由外形到內籠都好前衛，成架車我都好鍾意，我已經過咗好勇鬥狠嗰個階段，R8畀到我supercar的性能，卻相對比其他supercar容易揸，兼容性好，所以我揀佢。」
八多啲料畀大家聽，方sir架R8最快年尾有得攞，鍾意喺街目及靚車的女士，記得目及埋司機位，話唔定可以一睹方sir嘅風采添。
新歡AudiR8
壹句到尾
未來戰車真車版，08-09年18個quota未來香港已經賣晒，採用RS4的V8引擎配合成名的Stronic波箱，是新一代user friendly跑車王。
引擎：4.2V8
最大馬力：424ps
車價：$180萬起
壹蘋果車網 |
