方中信 一人晚餐
二○○三年十二月廿一日（冬至）傍晚六時正，藍田啟田道某私人屋苑樓下；方中信站在馬路旁的暗斜，等候著我。 穿著棕色長褸，明顯瘦了一圈的方中信，嘴角微微饒起，向我打招呼。 「妳好，我係 Alex！」然後來一個有酒窩的深情笑容，暈死！ 可惜，一個如此禮貌周周的俊男，早已被「Mark」住，女友是港姐出身的莫可欣。 拍拖八年，方中信已步入男人四十，但仍很享受過二人的同居生活，未有結婚打算。
原來，在兩個人背後的一人晚餐，滋味更無窮！ 方中信話：「一個男人肯同一個女人八年咁耐，相信，都唔會變啦！」不過換轉另一個講法，一個男人跟一個女人八年，但仍未肯拉埋，究竟，這個是否能給她幸福的男人呢？ 催婚
一個女人肯與一個男人共同生活八年，莫非都為了一紙婚書，要是我，一定催條佬娶我！ 我女友從沒有催過要結婚，（安於同居生活？）是呀。第一暫時沒有打算想生孩子；第二我要跟各位很渴求結婚的女士聽，不是結婚就代表安全，要離婚時亦不代表可以分到你老公一半的身家。女士成日渴望結婚，要知道結婚未必是好事，除非雙方都想結婚，都想生小朋友吧；但這一刻我和我女朋友都未想住。（你怎讓女友更有安全感？）都冇得走啦，跟她一起咁多年，她付出了咁多青春，我個心都唔會亂諗其他，等人家安心一些。 雖然如此，但方中信如此有型靚仔，我才不相信沒有螞蟻「嬲」蜜糖？ 嘻嘻……在香港，無論食飯抑或飲，我都會去熟的地方，而且幾乎大部份時間都有女友在場，就算出埠，女友如果沒有工作在身，都會一起去，如果遇到一些搭上搭的螞蟻，我女友只會鬧個女仔，並唔關我事喎，嘻嘻……
如果你覺得係俾人 Mark 實的話，就會是一件很痛苦的事，我只可以承認，她掌握得我好清楚，完全知道我的行蹤；而她的雀友，通通都是我朋友的女朋友；我去的地方，她又識人，好像周遭都是他的線眼似的，我又怎會走得甩呢！哈哈…… 這個外表大男人的小男人，成日笑到「嘻嘻」聲咁衰，唔信你們打風都打唔甩，都唔得啦！ 論盡姐仔 不過這個「東方李察基爾」，實際的緋聞數字其實少得有點不合理，對佘詩曼拍劇三個月，竟然不被「嗲」到，反而傳出不和，著實令人爆頭。但不和還不和，倒是「傳」而已，實際上他蠻欣賞這位花旦。
阿佘OK啦，有電視的衝力，有成功的小潛力，好容易明白到電視台導演的要求，始終是熟能生巧吧，再加上有天賦的小聰明，其實她已經很好了，不然怎做阿姐阿！但如果是在外面，例如電影或者是要求再高的國內電視劇，她情緒的醞釀可能還差少少，可能電視台的 Tample（節奏）要她快些少，所以她習慣了快，但若然要她拍一些很藝術或很文的戲，可能就要再投入醞釀耐些少。 而阿 Anne（向海嵐）都是一個很用心的演員，不似一些演員拍拍下唔知去邊，要人等一大餐都唔見人，在這個劇是少有發生的事情。 搵食 由八七年初見成績，拍電影終有機會擔正開始，方中信接拍過起碼五十套電影，（並未計算之前的二打六演出）；不過，他拍過的電影，我幾乎說不出片名，亦即是以「爛片」居多，是個錯誤的決定嗎？So，現在他就像個藝術家那樣，揀劇本揀得非常小心。 有很多片我是不會拍，是為自己 Set 了一個定位，某些片我會拍，某些片我是不會拍。試過有好多爛片給我很多錢，但我不拍，在這方面我有我原則。
嘩，到這個年紀都唔要求？死定了！真的死定了！ 我以前拍了很多爛片，簡直不堪入目，因為那時唔識諗，唔識為自己未雨稠繆。依家知道自己需要未雨稠繆，既然知道今時今日的電影圈，或者整個娛樂圈，我還可以立足的話，拍出來的質素一定要見得人，起碼不會俾人鬧。
（以前成日俾人鬧？） 有（加強語氣）！九年前我是賣埠的保證，賣去韓國呀，方中信有個價，那時真的誇張，試過一日裏面同時間踩四、五組戲，依家『不可能喇』（國語），連接的機會都沒有呀！但正因為那時拍得太多爛片，九五 年我就年幾兩年冇工開，日日坐屋企，冇晒心機，好頹、搵朋友飲酒度日。 唔要紅 報載，其實大部份紅的演員，在未紅前也拍過大量「爛片」，影帝梁朝偉正是個好例子。 不過要似梁朝偉，方中信寧願唔紅也罷！
（你唔想賺多點錢咩？） 有幾好？你搵一百萬，但會唔會使晒一百萬？不會嘛！買樓，我覺得夠住就 OK 囉！今時今日我想要的東西，雖然不是過份豪華，但總叫 Afford（負擔）得起去買，要買車就買車，要食飯就食飯，如果你要再 Upgrade（提升）一些，就要損失一些吧，損失你自己的私人空間，我不可以啊！ 我至愛自由，出 Trip（外埠工作）也是喜歡一個人，去大排檔食，最多俾人指指點點講兩句：『嘩！方中信喎，幾靚仔！』，冇問題；又唔會有一批人蜂擁而來的，不會像梁朝偉這樣囉，食都食得唔開心，你明明好想食大排檔的鑊氣，但因為你名氣去唔到，損失好大囉！
影帝夢 不過話說回來，方中信都想做影帝，不過是黃秋生那一種的影帝，而非梁朝偉的影帝。有得揀，黃秋生的草根、親民，比起梁朝偉的冷酷、高高在上，來得開心。 做影帝未必是紅的，黃秋生都是影帝，但他一樣可以食大排檔，他不會好似梁朝偉般，我想做黃秋生，但卻不想做梁朝偉。黃秋生是我好欣賞的演員，他的戲路很廣，好多角色都俾他做過晒，做什麼似什麼，警察、強姦犯、殺人犯、傻佬、變態佬……作為演員，這是一件令人很嚮往、雀躍的事，我希望有這的一天。 二人時間整個煮麵、食麵、睇電視的過程，方中信都顯得投入、認真、享受，尤其是臨尾飲埋啖味精麻油湯底，再「口夏」一啖熱氣出來，完全感受到那份滿足。 但一小時前，方中信重煩惱緊好唔好食晒碗麵，因為之後要返屋企陪女友食飯，你話換轉呢個麵係佢兩個的晚餐，一餐有燭光、浪漫到爆的晚餐，相信諗都唔使諗啦，食晒！
|
|||||||||||||||||
