車 人 一 句
方 ． 心 動 　 車 ． 迷 情

方中信最近多了在電視機出現，轉投向電視方面發展的他，繼早前於《烈火雄心》裡面飾演一位高級消防隊目及業餘賽車手之後，緊接下來又開拍新劇《花樣中年》。劇中方中信會飾演一位人到中年的成功人士，並會駕駛一架品味超凡的Alfa旅行車。而現實生活中，佢亦以此車作為日常代步之用，無論戲裡戲外，佢都係做番自己。
方中信
真名：符力
出生地點：澳門
出生日期：63年3月17日
生肖：兔
星座：雙魚座
身高：6呎
入行：做Model時被發掘
首部電視劇：《逃出珊湖海》
首部擔正電影：《朝花夕拾》
曾就讀小學：粵荃小學
曾就讀中學：粵荃中學
嗜好：潛水、賽車

ALFAROMEO
156SPORTWAGON2.0SELESPEED原裝規格表

引擎形式：列式4汽缸DOHC16VT-spark
容　　積：1,969c.c.
最大馬力：155hp/6,400rpm
最大扭力：19.1kgm/3,500rpm
全長/寬高：4,430×1,755×1,415mm
軸　　距：2,595mm
淨　　重：1,400kg
懸掛系統：（前）雙搖臂式/（後）多連桿式
制動系統：Selespeed半自動5前速，前輪帶動
輪胎組合：205/55R16
車輛提供/代理：嘉輪汽車有限公司28778788
車　　價：HK$258,000
牌　　價：HK$5,794
首　　期：HK$26,380
利　　率：4%Hp
供　　款：HK$5,738×48期
（＊以上為參考資料，未有計算保險在內，一切以車行報價為準）

獨 一 無 二 型 男 車

有呢架車的出現，全因為方中信同Alfa代理的老總EddyWong份屬老友，得知方中信將會開拍新片，為配合佢形象就決定提供一架獨一無二的戰駒俾方中信在戲中使用，而Man1呢個名就解作「型男1號」的意思！到底呢架車同普通街版的156有乜唔同呢？即睇！

車身改動主要係一套由意大利設計的包圍配件，包括頭泵把、四輪闊沙板、側裙、尾泵把同一塊三角形的尾翼，而其他改裝就有18吋O.Z合金軨、紅色真皮籠、矮彈弓及WP出品的6遮鮑魚連大型鑽孔通風碟等。

代理現正研究推出之可能性，估計新車價錢會俾正常貴3萬左右，即約$29萬。

車 ． 女 人

外形勁man的方中信自然能成為女人心儀的對象，不過佢其實並不如外形般花fit，對於車同女人佢更有一份獨特的見解，佢曾經有一句名言：「車同女人比，梗係女人重要點，不過換車可以代替換女朋友的習慣。」對於呢句名言佢點睇？
「其實男人大多都鍾意車，正如有些人鍾意相機、Hi-Fi、酒一樣，來來去去咪又係那幾樣東西。不過車點都重要唔過女人，車只係成年人的玩具，同女人唔可以比較。我幾歲時就已經鍾意車，那時成日坐老竇架車周圍去，佢架車好似叫做太子，依家一定無晒喇，連我都唔記得係點樣。」

太子係乜車？
太子係日產前身得勝時期的其中一款中型豪華轎車，係60年代一款幾受中產階層喜愛的車種，級數等同於而家日產的Cedric。

獨 愛 跑 車　因 為 未 老

就呢幾年間，方中信都買過唔少「玩具」，當中有平有貴，類型亦都極端，其實佢有無話特別鍾意邊一類型的車？
「如果係以開工日常開的話，我會揀旅行車，當然係因為佢慳油尾箱又裝得多東西。如果係純以享樂計，我都係鍾意一架單門跑車，我都未係好老，都重好鍾意呢類車。其實無話一定要3-4百匹以上的車先滿足到我，日本車的280匹已經好夠開了啦，歐洲跑車有幾百匹係bonus來，怎麼都開不完啦！」

一生追求速度
「我揀車，一定係性能先，其次係外觀，跟住先會諗舒服。不過我發覺我呢種思想已經開始變緊，始終人大了成熟了，無年輕時咁好勝喇，所以我依家偏向鍾意開外國車多點，因外國車多數舒服點、又安全點、隔音又好。」
所以開現在那輛Alfa156？
「係，佢確係一架品味獨特的車，意大利車的格調一向高雅，唔會係廿歲出頭的人可以接受，開著它出街其實不斷話緊俾人聽我是什麼性格。」
「依家都好少開快車，部156整體俾我感覺唔錯，部車性能唔錯，個F1波箱又好玩，日常用都夠的。不過年尾代理會換過架GTA俾我，有250匹馬力，到時乜改裝都唔搞喇，原本代理話幫我換個套軨，但我都話唔好，原裝那條都幾靚。」

Zender雙出尾喉，聲音沉厚有勁。

2.0引擎輸出不俗，遲下換部250匹的GTA就更加勁！

夢 想 買 林 寶

愛車之人心中都會有一架夢想之車，方中信亦唔例外，認定Baby林寶Gallardo係至愛，夢想亦就快可以成真。
「林寶堅尼早前推出了一架細版林寶，價錢2百萬左右，聽聞出年就會來香港，聽講有人訂了車，不過我想試了真車先諗，至於顏色就無乜所謂，只要唔係紫、粉紅呀那些就得喇！」

繼續電師奶

訪問之時，方中信正趕返TVB拍劇途中。新劇《花樣中年》係講3個將近40歲的大男人，如何面對中年帶來的一切變化，而方中信係飾演一個man到暈的廣告公司創作總監，曾獲國際廣告大獎，有中環RichardGere的外號，與蔣志光及錢家樂係同居兼好友。而在劇中方中信日常代步開的就係呢架Alfa156Man1，相信未來幾個月大家都會在公仔箱度見到佢的蹤影。問到佢會唔會繼續賽車，佢爽快地答：「會呀，不過家下真係好忙，今年就連過澳門睇賽車都唔得閒，要搵食嘛！寄望下年啦，我好想上珠海鬥雷諾2000。」

方中信夢想之車 廠牌：Lamborghini 車名：Gallardo 引擎：5公升V10 馬力：550PS 波箱：手動6前速

方 中 信 評 昔 日 戰 駒 ：

	豐田RR200（水貨） 車　　種：4門尾驅房跑車 規　　格：2公升直列4汽缸DOHC配VVTi引擎，210匹 幾時擁有：1999年 方中信評：AE86神話的延續，但原裝車唔太快，要適量改裝架東西先肯去，但車架幾硬淨，係一架好車。咁多部車之中，我最鍾意係呢架，因為係自己一手一腳改出來，放了好多心機落去，包括飛輪、電腦，蕉中尾喉、大尾牙等多不勝數。
	豐田Prado 車　　種：四驅車 規　　格：3.4公升V6DOHC引擎，185匹 幾時擁有：1997年 方中信評：舒服、好力，但因為車身高，避震軟，過彎側得較厲害，似坐船。
	三菱SpaceWagon 車　　種：7人車 規　　格：2.4公升直4DOHCGDI引擎，165匹 幾時擁有：1998年 方中信評：方便多用途家庭車，性能高亦算慳油，但用落發覺坐滿人機會其實唔多。
	保時捷911Targa 車　　種：純種尾驅跑車 規　　格：3.4公升6汽缸水平對向引擎，300匹 幾時擁有：2000年 方中信評：可趟開全玻摛頂夠綽頭，但亦因此令車架剛性較弱，上落壆個頂會有雜聲。力水夠，係一架好玩有型的消閒車。
	保時捷GT3 車　　種：高性能超級跑車 規　　格：3.6公升6汽缸水平對向引擎，360匹 幾時擁有：2001年 方中信評：賽車椅上落唔方便，車架太低上落斜一定「high」頭唇。極力子輕輪圈輕，少o野壞又唔易水滾，俾想像中好開同易開。
	富士WRX 車　　種：4門4驅房跑車 規　　格：2公升4汽缸水平對向引擎，280匹 幾時擁有：2001年 方中信評：加速力更勝舊款，但頭多尾少的驅動力分佈令架車偏向推頭，又沒有中差控制失色點（舊款STI屬標準設備）。其他都好平均，內籠設計比上代靚了好多。

● 撰 文 > 吳 業 禮 　 ● 協 力 > 沈 志 偉 　 ● 攝 影 > 葉 偉 豪 　 ● 部 份 汽 車 圖 片 由 《 壹 週 刊 》 提 供

壹 本 便 利 EasyFinder Online http://easyfinder.atnext.com/